Të njohim speciet e ZM të PK Llogara, RMN Karaburun dhe Lagunës së Orikumit        


Njerëzit në zonat e mbrojtura janë të lidhur me burimet natyrore dhe ekosistemet që mbështesin të ardhmen e tyre social-ekonomike dhe njohja e këtyre burimeve natyrore dhe vlerave të tyre, është e rëndësishme për të krijuar përdorim të qëndrueshëm të këtyre burimeve.

Për të lehtësuar njohjen me vlerat e burimeve natyrore në zonën e mbrojtur të Llogarasë dhe Karaburunit, po lançojme ciklin “Të njohim speciet e zonave të mbrojtura Parku Kombëtar Llogara, Rezerva Natyrore e Menaxhuar Karaburun dhe Lagunën e Orikumit” për të siguruar ruajtjen dhe përdorimin e qëndrueshëm të burimeve natyrore dhe ekosistemeve.

Kjo nismë është ndëmarrë në kuadër të projektit "Nga Mali në Det" financuar nga CEPF dhe zbatuar nga INCA.

Hypericum haplophylloides (Halacsy and Bald)

Taksonomia e species:

• Mbretëria: Plantae
• Mbi\Ndarja: Embriophyta 
• Ndarja: Tracheophyta 
• Nën\ndarja: Spermatophytina
• Klasa: Magnoliopsida
• Rendi: Malpighiales 
• Familja_:Hypericaceae
• Gjinia: Hyperichum
• Lloji: Hypericum haplophylloides

*Karakteristikat e species*:  Është shkurrëz e ulët me kërcej deri në 25 cm, të pajisur me 4 kënde pa flatra, të shpërndarë, të degëzuar dhe rrënjëzues në bazë. Gjethet janë të shogëta me gjelbërim të përhershëm, gjatore të përmbysëta-vizake deri eliptike-vizake, të spërveshura në buzë, me gjëndër të zezë në majë. Cimat kanë3-5 lule. Braktet janë pa qerpikë. Nënpetlat janëtë pajisur me qerpikë ose me dhëmbë gjëndrorë të zinj, shyte. Petlat janë 4 herë më të gjata se kupa, me gjëndra të vogla të zeza anësore, pa bisht. Kapsula përmban kanale rrëshinore gjatësore. Gjendet në pyje malore dhe shkëmbinj. Lulëzon në periudhën Mars-Shtator.

*Shpërndarja*: Fillimisht speciet e kësaj familjeje ishin native për Evropën dhe Azinë të cilat më vonë u sollën në Botën e Re dhe në Australi nga kolonistët evropiane. Hypericum haplophylloides përfaqësohet me dy subspecie Hypericum haplophylloides subsp. haplophylloides Halacsy & Bald. (e gjendur në disa haitate: në Llogara (tek burimi i sorkadhes, burimet e Palasës, shtegu i Jul Çezarit) në anë të rrugës automobilistike në Gjipe, në Sopot, në luginën e Kardhiqit Gjirokastër) dhe Hypericum haplophylloides subsp. devollense F.K. Meyer (endemike e zonës së Devollit) të cilat vlerësohen si endemike.

*Statusi: * VU (vulnerable) sipas IUCN, të rralla dhe janë përfshirë në Listën e Kuqe të bimëve të rrezikuara. 

*Kërcënimet*: Shkatërrimi i habitatit si rezultat i djegjeve natyrore ose të qëllimshme; mbikullotja në vecanti prej dhive; turistët vendas ose të huaj të painformuar.

Për të siguruar një mbrojtje më efikase të këtij lloji, në rastet e vëzhgimit të saj në natyrë përgjatë ndjekjes së shtigjeve në Parkun Kombëtar të Llogara-së, ju lutem të kontaktoni në faqet e mëposhtme duke e shoqëruar me foton reale, kordinatat e vendit ku u vu re dhe emrin tuaj.