Tiranë, 11-13 Qershor 2014

Menaxherët e Zonave të Mbrojtura të Shqipërisë mblidhen në Konferencën e parë Kombëtare.                Zhvillohen perspektivat e menaxhimit të këtyre pasurive natyrore të vendit

U organizua sot për herë të parë Konferenca Kombëtare e Zonave të Mbrojtura të Shqipërisë, një iniciativë e organizatës WWF (Fondi Botëror për Natyrën) në bashkëpunim me INCA (Insitituti i Ruajtjes së Natyrës në Shqipëri) dhe Ministrinë e Mjedisit.  Konferenca organizohet si një nga aktivitetet më të spikatura të projektit Parqet Dinarike të Shqipërisë me pjesëmarrjen e 50 specialistëve, menaxherëve dhe ekspertëve të zonave të mbrojtura. Ata do të diskutojnë mbi situatën reale të zonave të mbrojtura në Shqipëri dhe sfidat e menaxhimit të qëndrueshën të këtyre pasurive natyrore në të ardhmen. Zonat e mbrojtura përbëjnë 16 përqind të territorit të Shqipërisë  dhe janë pjesë e çmuar e trashëgimisë natyrore për vlerat unike të biodiversitetit.

Si pasuri kombëtare që mbartin përfitime të shumëanshme ekonomike dhe mjedisore, ato gëzojnë mbrojtje të veçantë me qëllim që t’ju shërbejnë qytetarëve shqiptarë me shërbime mjedisore si dhe si destinacione të çlodhjes në natyrë. Konferenca synon të mbështesë krijimin e një organizate të stafit shqiptar të zonave të mbrojtura që shkëmben eksperiencat menaxhuese me kolegët e rajonit të Ballkanit Perëndimor dhe do të jetë aktori shqiptar në zhvillimin e mëtejshëm të projektit Parqet Dinarike të Shqipërisë.

Mes të tjerash ne fjalën e tij Z.Paolo Lombardi, Drejtor i WWF për Programin e Mesdheut theksoi  “Zonat e mbrojtura do të kenë një rol në rritje si një strategji për të mbrojtur pasuritë natyrore të vendeve dhe rajoneve. Zonat e mbrojtura janë të nevojshme për të siguruar një rrjedhë përfitimesh të tilla si uji, mbrojtja e tokës, reduktimi i karbonit, elasticiteti ndaj ndryshimeve klimatike, mbështetja për industrinë e turizmit, hapësirat clodhëse për komunitetet. Projekti DAP dhe ne nga WWF jemi këtu për të ndihmuar vendet e rajonit te Adrias për të zhvilluar me largpamësi mundësitë e ofruara nga zonat e mbrojtura.”

Sesionet e Konferencës do të  vijojnë nesër në Parkun Kombëtar të Dajtit, me punën e detajuar të grupeve në çështjet e menaxhimit të qëndrueshëm të turizmit, vlerësimit të përfitimeve që vijnë nga zonat e mbrojtura si dhe përmirësimin e proçesit të komunikimit me publikun shqiptar. Në kuadër të kësaj Konference, WWF dhe INCA partneri shqiptar në këtë projekt organizojnë ditën e premte, datë 13 Qershor nje vizitë me median dhe pjesëmarrësit në Parkun Kombëtar të Divjakës.